ايش اخذ من مكملات واكلات تزيد المناعه بوقت الحجر المنزلي – فايروس كورونا my supplement during quarantine

السلام عليكم ورحمة الله وبركاته

شاركتكم بالانستقرام اي موضوع تبغوني اكتبه وكان مابين ( تحدي الصحيان 5 صباح) او ( مكملاتي الغذائية هالفترة ) والاغلب اختار المكملات الغذائية … ودا هو موضوع اليوم ان شالله بالمدونة

المكملات الغذائية ؟ ايش فايدتها ؟

انا مو مختصة ولا خبيرة .. انا أشاركم تجربتي ومعلوماتي الي متاكده منها فقط .. فلازم تتأكدوا قبل لا تاخذو اي شي ان صحتكم تمام او يناسب وضعكم الصحي

طيب ايش هي المكملات الغذائية ؟؟ هي باختصار او بشرح سريع هي غذاء اواكل ولكن بصورة مختلفة تكمل النقص الي بأكلكك … او اذا انتي ماتاكلي كويس تاخذي هالمواد عشان تغطي النقص أو تزيدي تنوع الفوائد في أكلك

ولكن !!!!! في ناس تعتبرها شي أساسي ؟؟ او لابد منه !! او اذا مااخذته فوضعي غلط !! .. من اسمها مكمل !!

ولازم تعرفي اذا اخذتي مكملات و وأكلك العادي هو ناقص كثير مارح يساعدك اذا بس بتعتمدي على المكملات .. لازم تحاولي تعدلي اكلك .. لان بالنهاية الاكل الطبيعي أفضل واحسن وهو المصمم لجسمك .. الباقي يعتبر مكمل مساعد يسهل لك تكملة النقص فقط

هل مهم المكملات هالفترة ؟؟

.. يعتمد على وضعك الصحي وطبيعة أكلك الحالي ونشاط .. المهم هالفترة زيادة المناعة المناعة المناعة لان الفايروسات دائما جسمنا يهاجمها فلازم نزيد المناعة اكثر هالفترة لان نحتاج مناعو أقوى من قبل لان هالفايروس قوي جدا … بس بالنهاية احنا نعمل بالاسباب وبالنهاية اقدار ومشيئة الله ولكن لابد من اخذ الاحتياطات كلها ومن ضمنها اكلك وطبيعة نومك ونشاطك

ايش اشكال المكملات ؟

في حبوب … في بودرة … في سائل … وفي انواع لان يعتمد على طبيعة جسمك والامتصاص . .في ناس تفضل البودرة لان بتحطها بوجبتها او حبوب لان نتائ الامتصاص بجسمها افضل او غيره من الاسباب

وفي مكملات لفيتامينات ومعادن او احماض وغيره .. وفي الي تكون مكمل أكل .. وهي اصلا اكل ( يعني شاهي بودرة او ثوم بشكل حبوب او بودرة او بروتين على شكل بودرة او جرعة كركم وهو عباره عن عصير كركم ) وهكذا

فمو كل المكملات تعتبر صناعيه اوبس حبوب .. في بعضها أكل وينضاف في اكلك ومشروبك

متى تبان نتائج المكملات ؟

الشي الي مو حلو في اي مكمل خاصه الحبوب من تجربتي مايبان نتائجه بسرعه وهذا طبيعي لان لازم يكون في اخذ مستمر عشان الفوائد تنبني في جسمك وتغطي النقص .. فاوقات يكون ملل او زهق وتوقفي اوقات او تنسي او تحسي بدون فائده بس لازم تاخذي وقتك يعني لمده شهر او اكثر في البعض ينصح لمدة 3 شهور بعدين تشوفي الفوائد .بس يعتمد على حسب جسم كل وحده وامتصاصها للفوائد واكيد اكلها ووجباتها الي اكيد بتساعد مع المكملات

مكملاتي الحالية ؟

الحديد : لان عندي نقص عالي

فيتامينات متعددة : الحبوب الي تحتوي على فيتامينات متعددة

عسل : اخذ ملعقة عسل

حبة سوداء : كفاية انها توصية الرسول وقوتها للمناعه جبارة وهالفتره احتاج التزم فيها

جرعات : الي يتابعني بالانستقرام يعرف قد ايش انا والجرعات اخوان هههههه – اقرو موضوع هنا و كمان حطيت وصفة المناعة جديدة بالانستقرام – هنا – ووصفة المناعة سابقة – هنا– وفي وصفة الشيخوخة – هنا– … اخر وصفة حطيت فيها العسل والحبه السوداء فيكوو بشي واحد

المغنيسيوم : لان قريت انها كويس لدعم العظام والعضلات بحكم ان عندي التهاب ولكن لسا مااقدر اتكلم عنها لان لسا قبل شهر بديت

هل في مكملات تبغي تاخذيها ؟

حابه اجرب بودرة الخضار وهي عباره عن خضار مشكل ( مختارين الخضار الي معروف بكمية الفوائد الكبيرة الي فيهم ) .. في كثير ماركات وكثير انواع

فحابة اجرب هالشي لان مقصرة باكل الخضروات وكتنويع طريقة مختلفه تاكلي خضرواتك وخاصه اني ابغا اشرب مشروبات وعصيرات صحية أكثر من قبل

بالنهاية

لازم تنتبهوا من المكملات لان مو كل شي يناسبكم والكميات لازم تكو مدروسة قدر المستطاع لان يمكن توص لحد التسمم الله يحميكم

لاتنسوا تشاركوا هالتدوينة مع غيركم وتابعوني على الانستقرام والسناب

عيشوا بحب وايجابية

Leave a Reply