2020Recap الي صار ب٢٠٢٠

السلام عليكم ورحمة الله وبركاته

لازم هالموضوع ينكتب ويوثق بالمدونة لان هالفتره كانت غريبه ع الكل

بداية ابغا اقولكم ان ربي يجبر خواطركم ويسهل امركم ويرفع عنكم كل هم لن هالسنه تاثروا الكثير سوا ماديا نفسيا اجتماعيا وغيرها وكانت صعبه وظروفها كسرت ظهر الكثير فالله يرزقنا ويعينا اجمعين

هالتدوينه ابغا اركز ع شي يحفزنا ويحمسنا .. طبعا هذا مايعني ان مافي امور سئيه او مو حلوه حدثت .. ولكن خلونا ايجابيين هنا

ورح اتكلم عن لوحه الرؤيه الي كتبتها بدايه السنه ٢٠٢٠ وهل حققت منها شي او ل؟؟

اول هدف كان : ابني عضلات واخسر وزن ؟؟

الحمدالله قدرت اخسر وزن وابني عضل والي يتابعني بالانستقرام او السناب كان معاي برحلتي خلال هالسنه .. طبعا هل وصلت للجسم او الهدف الاساسي !! لسى ابغا اطور اكثر من نفسي .. هالصوره لاخر وزن والمقاس الي قبله .طبعا كان في مقاسيين اكبر بس ماحصلتهم فتغير مقاسي من ٤٨ الى ٣٦ اللهم لك الحمد

وخلال فتره كورونا وحوسه الايام كان برنامج بزي الرياضي المنقذ لي والي الان تقدرو تحصلوه (busy program ) من موقعي مع خصم ١٠ بالميه باستخدام كود 2021

Www.soactive.co

ثاني هدف كان : ابدا شغل الخاص سوا ولنسsoa wellness

ولله الحمد بديت شغلي الخاص والي كان عباره عن منصه لنشر ثقافات العادات اليوميه واثرها .. وسويت اول ورشه عمل .. و٣ جلسات عبر زووم … وصممنا برامج يوميه لعدد من العملاء …. ونشرنا بروش عن لوحه الرؤية وكيف نسويها ..

بالاضافه بديت بودكاست .. اسمه shots of what ?? وسوينا كم حلقه تكلمت فيها عن تجربتي .. وسويت مقابلتين مع شخصيات ملهمه

طبعا الرحله مو سهله كانت .. ويبغالها تدوينه خاصه … باذن الله

ثالث هدف لي كان : احقق مبلغ مادي عالي؟

طبعا لسى خاصه كعمل خاص كاول سنه غالبا مارح يكون سهل .. ولكن خلال هالسنه بجوانب مختلفه قدرت بشكل او باخر احاول احتفظ بمبالغ ماليه ولو انت بسيطه …مع ان للاسف هالسنه اكثر سنه صرفت فيها وهذا شي غريب حتى علي انا بس الحمدالله

رابع هدف لي كان : اطور من مدونتي بوش لايف

ولله الحمد الان تقرون المدونه من خلال تغيير هويتها الى هويه جديده اسمها Soactive.co والي الان هي عباره عن موقعي للتدريب الشخصي الرياضي .. وتابعونا ع الانستقرام

كمان نسبه المشاهدات للتدوينات هالسنه بقرابه ٥٠ الف مشاهده علما ان هالسنه كانت ضعيفه من ناحيه عدد المواضيع بس الحمدالله كله تيسير من الله ودعمكم لي

خامس هدف لي كان اني اقلل البلاستيك والنفايات؟

هالسنه ببدايتها سويت تحدي تقليل النفايات وكنتو معاي بهالموضوع بمواقع التواصل الاجتماعي .. والمدونه وشاركتم رحلتي فيها … واستمتعت كثير واتريقو علي كثير ههههه

طبعا هذا مايعني اني توقفت تماما عن استخدام البلاستيك .. لسى تمر شهور استخدم بلاستيك كثير وشهور لا.. بس فخوره اني بديت اسعى لعاده جديده وجدا مفيده

سادس هدف لي كان : اني اكثر خضار باكلي واسوي عصير خضار ؟

هالجانب للاسف فشلت فيه .. او نقدر نقول ماحطيت جهد كبير فيه… مع اني جربت وحاولت ولكن ماكان فيه التزام قوي.. هل يعني مااكلت خضار؟؟؟ لالالا … اقصد اني ابغا يكون الخضار شي اساسي بكل وجباتي قدر المستطاع واشرب بشكل يومي عصير خضار وهذا الي ماانجزته

سابع هدف لي كان : اني اقضي وقت اطول مع الناس الس احبهم …؟؟

ماكان سهل وماكان صعب … بس مو راضيه عن جهودي لسى بهالجانب وابغا اشتغل عليه اكثر باذن الله .. لان هالسنه علمتنا ان لازم نستثمر في الناس الي حولنا

في اهداف او امور جربتها ثانيه ولكن تعتبر شخصيه فباحتفظ فيها لنفسي …

بس في اهداف جات فجاه ا افكار جات فجاه ان اسويها خلال هالسنه وقد تكون خربت علينا لان فجاه نبغا نسوي شي او غيرت كثير امور او جابتلنا ضغط هههه

مثلا :

صرت مدربة معتمدة: وكان قرار لفتره يدور ببالي بس قررت خلال الحجر ع اساس عندي وقت ولما بديت الدراسه فكو الحضر ورجعت للدوام هههههههه فكان ضغط كبير علي لدرجه كنت ابكي وهذه يبغالها سالفه لحالها ههههه

لما قررت ابدا بودكاست : كان قرار لمصلحه العمل وكان شي يمكن احبه بس ماتوقعت اني اسويه ..

اشتريت جاهز رياضه: الي يتابعني يعرف اني اسوي تماريني بدون اجهزه لمده ٧ سنوات تقريبا .. بس مع الضغط احتجت لو شي بسيط يساعدني .. فكان قرار طووووويل لين شريت دراجه رياضيه

اقص شعري مره قصير : مدري اقولكم انه مكافاه ولا من الضغط ههههههه انتو ورايكم .. بس كان تغيير لابد منه بعد سنووووواااات من التفكير

قررت اجرب اني اكون نباتيه: .. وشاركتم هنا التجربه

وجربت اقطع السكر لمده شهر :… وشاركتم هنا التجربة

الفكره الي ابغا اوريكم هوا ان قولي انك انجزتي لانك حاولتي مو لانك حققتي الهدف … يعني كل اهدافي السابقه ماكانت انجاز انتهى.. كانت محاوله اسوي شي لمده او لفتره .. يمكن كانت لشهر لشهرين و وقفت وغيرت وسحبت او لسى لازم اكمل .. بس بكتبها كفخر وانجاز للمحاوله .

وانتي كمان .. اكتبي الي حاولتي عليه .. الي جربتيه .. الي قلتي تبغي تسويه وسويتي شوي منو …. وان مانجحتي وان مااستمريتي … كل ماتثني نفسك كل مارح تفكري ترجعي تكملي هالهدف …

بالنهايه اتمنى لكم انجاز ورا انجاز .. كل يوم هو بدايه لتحقيق شي ولو كان بسيط ..

Leave a Reply