مجانا برنامج صحي لشهر رمضان المبارك بدون حرمان Healthy Ramadan program

السلام عليكم ورحمة الله وبركاته

اليوم التدوينة لموضوع شخصيا مريت فيه وشفت غيري يمر فيه بوضع اسوء الي هو تخطيط شهر رمضان على انه شهر التحول والتغيير الجذري

هذا شي يعتبر جيد بحكم انه رمضان شهر عبادة وقرب من الله والسعي للتخلي عن بعض العادات والاخلاقيات الغلط فالكثير يشوفه افضل وقت انه يبدي حياه صحيه ويخسر او يزيد وزن ويسوي رياضة الخ

لكن المصيبه

ان غالبا اي نتائج بهالشهر تبدا تخرب بعد مايخلص ليش يا ترا ؟؟ لانك حرمت نفسك وسويت نظام صارم في شهر يعتبر مو عادي لانه شهر تتختلف فيه كثير امور مثل نومك دوامك شخصيتك وضغط والخ فكيف تجبر نفسك بهالشهر كمان تزيد الهم ويصير في تحدي وجدول جديد

المفروض خلال السنه تبدا بهالنظام والجدول وشهر رمضان اما تستمر عليه او تبدا تريح نفسك فيه

فلاني جربت هالشي بسنوات سابقه ( ولكن مادخلت بحرمان ) وغيري جربه ودايم زي ماقلت النتائج ماتقعد فلا انت الي استمتعت برمضان ولا الي تغيرت لمدة طويلة واستمتعت في نتائئجك

قررت اخر كم سنه اني استمر على عادات اكل معقولة تناسب وضعي وبيئتي واستمر على رياضتي وروتيني

فمثلا اكل الي موجود بالسفره بكميات معتدلة وعلى فكرة تجي ايام اخربها مررررره و احاول اسويلي اكل يكون مشوي قدر المستطاع واسوي رياضتي مهما كان وضع اكلي بهاليوم عشان ابتعد من اي توتر اوضغط بخصوص هالموضوع

والجميل ان اطلع من رمضان نفس وزني وبنفسيه حلوة واستمتعت باجواء هالشهر

فعشان كذا حبيت اقولكم ان سويت برنامج رمضاني لكل شخص مشغول او وقته مو له او مايعرف ايش ياكل او ايش يتمرن ويسويله جدول رياضي بدون اي تعقيد اوخطة طويلة

البرنامج في له قسمين قسم وصفات وقسم رياضة

قسم الاكل

فيه 23 وصفة والحلو ان الوصفات لاكلات عربيه وماهي صعبه واي احد يقدر يسويها

والاجمل ان المقادير متشاركه يعني كثير اصناف بنفس المكونات

والاحلى انه بدون قياس مهما حطيتي كل المكونات مكمله لبعض ولذيذه

والاحلى والاحلى انها بس باقل من 15 دقيقة تتسوى

هالقسم مافيه مكونات عضويه او بدائل او او او اكلات ومكونات في كل بيت ولكن الفرق انها محدودة مافيها كم كبير وماحبيت اعقد الموضوع غالبا لان شهر رمضان فيه مصاريف كثيره واوقات الكثير مو بيدهم فحبيت شي يناسب الكل

قسم الرياضة

فيه جدول ل3 ايام مقسم لجزء علوي وسفلي وكامل الجسم

الحلو ان العلوي والسفلي فيه 5 تمارين فقط

وجزء كامل الجسم فيه كل مره تحدي واكيد فيه تمارين تسخين وتهدئة وخطة بسيطة وسهله

هالبرنامج بالمجااااان

وتقدروا تحملوه الان

ابغا بس دعمكم لي ودعواتكم والاهم تشاركوني رايكم وتجاربكم

ولااازم ماترسلوه لاحد خلوهم هم يحملونه عشان دايم يفتكرو ان في دليل عندهم لو حسو بتوتر او ضغط يقدرو يرجعلو لانهم هم حملوه بنفسهم

اتمنى لكم رمضان جميل وكل عام وانتو بصحه وعافيه يارب

Leave a Reply